عجبي عليك ..عجبي عليك يا زمن
يا بو البدع يا مبكي عيني دمـــــــــــا
ازاي انا اختار لروحي طريــــــــــــق
وانا اللي داخل في الحياه مرغمـــــا
وعجبـــــــــــي.....
مرغم عليك يا صبح مغصوب ياليل
لا دخلتها برجليا ولا كان لي ميل
شايلني شيل دخلت انا في الحياه
وبكره هخرج منها شايلني شيل
وعجبـــــــــــي....
خرج ابن ادم م العدم قلت: ياه
رجع ابن ادم للعدم قلت:ياه
تراب بيحيا..وحي بيصير تراب
الاصل هو الموت ولا الحيــــاه
وعجبـــــــــــي.....
قالو الشقيق بيمص دم الشقيق
والناس ماهياش ناس بحق وحقيق
قلبي رميته وجبت غيره حجر
داب الحجر ورجعت قلبي رقيق
وعجبي....
يوم قلت اه سمعوني قالو فسد
ده كان جدع قلبه حديد واتحسد
رديت على اللايمين انا وقلت ..اه
لو تعرفو معنى زئير الأســـــــــــــد
وعجبــــــــــــــــــي....
حبيـت ... لكن حب من غير أمان
وصاحبت لكن صحبه مالهاش أمان
رحت لحكيم واكتر لقيت بلوتي
ان اللي جوه القلب مش ع اللسان
وعجبــــــي....
دخل الربيع يضحك لقاني حزين
نده الربيع على اسمي لم قلت مين
حط الربيع أزهاره جنبي وراح
وايش تعمل الازهار للميتيــــــن
وعجبــــــــــي....
مهبوش بخربوش الألم والضياع
قلبي ومنزوع م الضلوع انتزاع
يا مرايتي ياللي بترسمي ضحكتي
يا هلترى ده وش ولا قنـــــــــــاع
وعجبـــــــــــي....
موضوع: رباعيات لجاهين فيلسوف ولاد البلد 
الأحد مايو 11, 2008 8:36 pm
